Սննդակարգն աթերոսկլերոզի ժամանակ. armeniamedicalcenter.am

Աթերոսկլերոզի զարգացման պատճառները

Աթերոսկլերոզը հաճախ հանդիպում է տղամարդկանց մոտ 40-60 տարեկանում և 50 տարեկանն անց կանանց մոտ: Զարգացման հիմնական գործոններն են` սխալ սնունդը, նյութափոխանակության խանգարումները, ոչ ակտիվ կյանքը (որպես հետևանք, ի հայտ է գալիս ավելորդ քաշ), արյան մեջ խոլեսթերինի բարձր քանակը, ծխելը, բարձր զարկերակային ճնշումը և սթրեսները: Աթերոսկլերոզից մահանում է մոլորակի ամեն երրորդ բնակիչը: Ընդ որում, ռիսկի խմբում են 19-20 տարեկան մոտավորապես 29 տոկոս մարդիկ: Իսկ 25-30 տարեկանների մոտ արդեն դիտվում են աթերոսկլերոզի կլինիկական արտահայտությունները:

Աթերոսկլերոզի կանխարգելումը

Աթերոսկլերոզի կանխարգելման համար անհրաժեշտ է հետևել ապրելակերպին` հատկապես սննդին: Արյան մեջ խոլեսթերինի, հատկապես` ցածր խտության լիպոպրոտեինների խոլեսթերինի, այսինքն, «վատ» խոլեսթերինի բարձրացման կարևոր պատճառ է սննդով չափից ավելի հագեցած ճարպեր և խոլեսթերին օգտագործելը: Հագեցած ճարպ հիմնականում պարունակում է կենդանական մթերքը՝ միս և կաթնամթերք:

Կենդանական սննդամթերքն է պարունակում նաև խոլեսթերինը: Այն հատկապես շատ է ձվի դեղնուցում:

Ինչպե՞ս սնվել աթերոսկլերոզի ժամանակ

Ամենօրյա սնունդը պետք է շատ կալորիական չլինի, բայց լինի բավարար` նորմալ քաշ պահպանելու համար: Օգտագործվող մթերքները պետք է պարունակեն սպիտակուցներ, ճարպեր և ածխաջրեր 1:1:3,5 հարաբերակցությամբ:

Մշակված է 2 աստիճանով սննդակարգ:

Առաջին աստիճանի սննդակարգ

Կարող է օգտագործվել ամբողջ բնակչության կողմից աթերոսկլերոզի կանխարգելման համար: Այն սովորական է արևմտյան երկրների համար: Պետք է կտրուկ սահմանափակել կամ բացառել ձվի դեղնուցի, լյարդի, երիկամի, ուղեղի, ճարպի, կարագի, հալած պանրի, թթվասերի, յուղոտ մսի օգտագործումը: Կաթը չպետք է պարունակի 1 տոկոս ճարպից ավելի: Կերակրի պատրաստումն իրականացնել միայն բուսայուղով (արևածաղկի կամ ձիթապտղի), մարգարինի նուրբ տեսակներով; Խորհուրդ է տրվում առանց կաշվի հավի և հնդկահավի, երիտասարդ ոչխարի, հորթի մսի և ոչ յուղոտ տավարի մսի օգտագործումը: Թույլատրվում են ձկնեղենի բոլոր տեսակները: Սննդում պետք է ներառել բուսական մթերք՝ կարտոֆիլ, հատիկեղեն, մրգեր: Սննդակարգում կարևոր են լոբազգիները, ոսպը և այլն:

Երկրորդ կարգի սննդակարգ

Այս սննդակարգն ավելի խիստ է՝ ձվի դեղնուցը, լյարդը, երիկամը, ուղեղը, կարագը, յուղոտ միսը, ամբողջական կաթնամթերքը պետք է բացառել: Կարելի է օգտագործել ձուկ, պանիր, ցածր յուղայնության կաթնաշոռ, լոբազգիներ և հատիկավորներ, մրգեր, բանջարեղեն: Այս սննդակարգը սահմանափակվում է աթերոսկլերոզով հիվանդների խմբով:

Ներկայում գոյություն ունեն մի շարք դեղեր, որոնք նվազեցնում են լիպիդների քանակն արյան մեջ: Բայց, ինչպես ցանկացած դեղորայք, նրանք զուրկ չեն կողմնակի ազդեցությունից: Այս պատճառով ճիշտ է, նախ, փորձել սննդակարգը:

Աթերոսկլերոզի կանխարգելման և բուժման համար կարևոր է նյութափոխանակության կարգավորումը: Կենսական օրգաններում արյան շրջանառության խանգարման կարգավորումը հնարավոր է իրականացնել որոշ դեղաբույսերի օգնությամբ. խատուտիկ, մատուտակ, արևքուրիկ, կատվախոտ և այլն:

Հարցեր, պատասխաններ, մեկնաբանություններ